Betribsreglement

Adress:                    Home Belvédère rue Jean Friedrich L - 3469 Dudelange

Post Adress:             Les « Amis des Gréng Scouten a Guiden Diddeleng a.s.b.l. »        BP 3 L - 3401 Dudelange

Handy vum Responsabelen «location»: (+352) 621 249 386

E-mail:                     Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

 

Mir, d’«Amis des Gréng Scouten a Guiden Diddeleng a.s.b.l.» halen immens drop fir Iech deen Beschtméiglechen Openthalt bei eis ze garantéieren.

Wann dier bei eis campéiert oder logéiert ginn et bestëmmte Regelen fir anzehalen, an déi stinn an dësem Dokument.

De Responsabelen fir d’Locatioun steet iech mat Rot an Dot zur Säit.

Merci fir äert Verständnes a mir wënschen Iech e flotten Openthalt bei eis.

Haapt-regelen

D’Souslocatioun an all aner kommerziell Aktivitéiten sinn op eisem Site nët erlaabt.

Am Home an och am Sanitärblock däerf nët gefëmmt ginn. Dobaussen mussen d’Zigarettestëmp an di metallen Eemeren bei den Entréesdieren geheit ginn.

D’Gesetz iwwert de Gebrauch vun Alkohol muss agehal ginn.

Et däerfen keng Miwwelen mat eraus geholl ginn.

Den Internetzougang däerf nët fir Gesetzeswiddreg Aktivitéiten benotzt ginn.

An de Bannenhäff däerfen keng Gefierer geparkt ginn. (Zoufahrt fir d’Pompjeeën)

 

Sécherheetsbestëmmungen

D’Noutausgäng an och di gemeinsam genotzten Raim däerfen nët mat Gepäck oder anere Saachen zougestoppt ginn. D’Pompjeeën mussen ëmmer Zougang hunn.

Schosswaffen a Sprengsätz egal wellecher Aart sinn op eisem Terrain verbueden.

An de Bannenhäff däerf nët mam Ball gespillt ginn.

Feieralarm

Am Fall vun Feieralarm muss all Mënsch aus dem Gebai. Bei Feier muss den 112 ugeruff ginn.

Bei engem Feelalarm kann een d’Sireenen ofstellen, de Code heifir ass “1111” . Egal wéi muss de Responsabelen vun der Locatioun informéiert ginn. Tel.: +352 621 249 386

All d’Onkäschten bei engem provozéierten Feelalarm ginn op d’Käschten vum Locataire.

Responsabilitéit

Bei all Grupp muss während deenen hirem Openthalt stänneg en Erwuessenen Responsabelen derbäi sinn.

Bei enger privater Locatioun muss de Locataire als Responsabelen op der Plaz sinn.

Rou

D’Nuetsrou ass tëschent 10 Auer owes a 7 Auer Moies. D’Noperen däerfen nët belästegt ginn.

Propretéit

All Locataire muss während sengem Openthalt derfir suergen dass alles Propper an och an der Rei bleift.

Hien muss

  • d’Raimlechkeeten botzen
  • d’Dreckskëschten an de groussen Container eidel maache goen
  • oppassen dat alles propper bleift

D’Dieren mussen ëmmer zougespaart ginn wann keen dobannen ass.

Waasser- a Stroumverbrauch solle spuersam gehandhaabt ginn.

Offäll

Aus Hygiènesche Grënn mussen d’Offäll getrennt ginn an och an zougestrécktenen Plastikstuten an di grouss Containeren bei der Haaptentrée geheit ginn.

Ausser de Feierdeeg mécht d’Gemeng d’Container all Donneschdes moies eidel. D’Dreckskëschten aus der Kichen, de Versammelungsraim an aus dem Sanitär musse regelméisseg eidel gemeet ginn.

Dortoiren

D’Dortoiren si keng Openthaltsräim an duerfen och nët dofir benotzt ginn.

Et muss een seng eegen Schlofsäck matbréngen. An den Dortoiren sinn einfach Better mat Matratzen inklusiv Schutz, et ass keen Gedecks do.

Circulatioun

Fuert um ganzen Terrain am Schrëtttempo. Denkt un d’Kanner. Gefierer däerfen nëmmen do geparkt ginn wou et virgesinn ass. An de Bannenhäff däerfen keng Gefierer geparkt ginn. (Zoufahrt fir d’Pompjeeën) D’Gefierer däerfen och nët hei gewäsch ginn. Karawanen a Campingcaren sinn nët erlaabt.

Ofrees

Virum Départ:

  • d’Still an d’Dëscher mussen zeréck op hier Platz
  • di benotzten Raimlechkeeten mussen gekiert ginn
  • d’ Kichegeschir an d’Läffelsgeschir musse gespullt an zeréck geraumt ginn (fir d’Spullmaschinn onbedingt d’Gebrauchsanweisung duerchkucken)
  • all d’Dreckskëschten eidel maachen
  • d’Fënsteren an Dieren zoumaachen, d’Heizung kleng stellen
  • d’Luuchten ausmaachen an all elektresch Geräter ausschalten (ausser Frigo an Truh wann eppes dran ass)
  • all genotzten Raum muss ganz propper gebotzt ginn (zielt nëmmen fir d’Scoutsgruppen)

A Präsenz vum Locataire gëtt bei der Urees a beim Départ all Raum kontrolléiert.

Zousätzlech vun eis geleeschten Botzstonnen kaschten de Locataire 30€.

Campingsplazen

De Responsabelen vun der Locatioun weist Iech wou d’Zelter opgestallt ginn. Et däerfen keng Lächer an de Terrain gemeet ginn an den Originalzoustand muss bestoe bleiwen. D’Planzen an d’Dekoratiounen mussen respektéiert ginn. Et ass verbueden Neel an d’Beem ze schloen oder Äscht ze schneiden. Feier däerf nëmmen op der Feierplaz gemeet ginn. Jiddereen muss derfir suergen dass keng Piquet’en zeréckbleiwen an dass och soss näischt op der Campplaz ronderëm trëllt.

Déieren

Hënn mussen zu all Moment un der Léngt gefouert ginn an de Besëtzer muss d’Hondsgesetz vum 9. Mee 2008 respektéieren an och ëmmer beim Hond sënn. Jidder Hondsbesëtzer muss derfir suergen dass d’Hënn näischt hanner loossen. Et däerfen wéinst der Hygiène keng Déieren an d’Kichen uder an d’Dortoiren.

Schued

De Locataire ass responsabel fir all Schued um Home, der Campingsplaz, der Kichen oder dem Sanitär, hien muss dofir och fir all Schued opkommen. D’”amis des Gréng Scouten a Guiden” ass nët responsabel fir Déifställ oder Accidenter op hirem Site. Jiddereen deen bei eis lount muss eng Unfall- an eng Haftpflicht-assurance hunn.

Beim net-anhalen vun dësem Reglement muss een eise Site direkt verloossen.

Am Fall vun Rechtssträit sinn di lëtzebuerger Geriichter zoustänneg. Die franséisch Versioun vun dësem Reglement ass och ëmmer massgebend.

Reglement vum 25 Juni 2018

D’Frënn vun den “Gréng Scouten a Guiden Diddeleng a.s.b.l.”